الخصوصية والشروط

الخصوصية

شنو نحفظ عندنا

الغرف

لما تفتحون غرفة لعب (الدامة، «جاوبها!»، «باص كومبليت»، «ارسمها!») نحفظ فيها الاسم اللي كتبتوه، ورمز عشوائي يربط جهازكم بمقعدكم، وحالة اللعبة: النقاط والإجابات والكلمات والرسمات. الغرفة كلها تنمسح تلقائياً بعد ٢٤ ساعة من آخر حركة فيها، أو بعد ساعة إذا محد دخلها غير اللي فتحها.

الدردشة

الرسائل (لحد ٢٠٠ حرف) تنحفظ داخل الغرفة، آخر ٥٠ رسالة بس، وتنمسح ويا الغرفة. ما نقرأ الدردشة وما فيها فلتر، فلا تكتبون فيها شي ما تبون اللي وياكم يشوفونه.

«سجل المواجهات»

لما تسوون سجل نحفظ رمزه (٨ أرقام)، واسم كل واحد منكم، وصيغة اللقب إذا اخترتوها (ملك أو ملكة)، ونتيجة كل لعبة أونلاين تنحسب فيه: أي لعبة، ومنو فاز، ومتى. نحفظ آخر ١٥٠٠ نتيجة ومجموع الفوز لكل لعبة. السجل يبقى لين تمسحونه بزر «امسح السجل نهائياً» تحت السجل في صفحة الألعاب، من أي جهاز من الجهازين: وقتها ينمسح كله من عندنا وما يرجع، والرمز ما يشتغل بعدها. أما «افصل هالجهاز» فيشيل الرمز من جهازكم بس، والسجل يبقى.

شلة «جاوبها!»

لما تسوون شلة نحفظ رمزها، وأسماء الأعضاء والإيموجي اللي يختاره كل واحد (لحد ١٢ عضو)، وآخر ٣٠٠ لعبة بأسماء اللي لعبوا ونقاطهم (حتى الضيوف)، والأوسمة، وإجابات «تحدي اليوم» لآخر ٣٠ يوم، وأسئلة «عن بعض» اللي تكتبونها (لحد ٣٠ سؤال لكل عضو). الشلة تبقى لين أقدم عضو فيها يحذفها نهائياً. إذا طلعتوا من الشلة تنمسح أسئلتكم وأوسمتكم وإجاباتكم اليومية، واسمكم في الألعاب القديمة يصير «لاعب سابق».

بلاغات الأسئلة

إذا بلّغتوا عن سؤال نحفظ رقم السؤال وسبب البلاغ والملاحظة اللي تكتبونها (لحد ٣٠٠ حرف)، بدون اسمكم وبدون عنوان الإنترنت مالكم. نحفظ آخر ٥٠٠ بلاغ.

الحماية من الإزعاج

عشان نمنع فتح الغرف بالكوم أو تخمين الرموز، نحفظ عنوان الإنترنت (IP) مع عدد المحاولات لفترة قصيرة، وينمسح تلقائياً خلال ساعتين تقريباً. وفي الصفحات المحمية بكلمة سر نحفظ العنوان مع عدد المحاولات الغلط، وينمسح بعد يوم تقريباً من آخر محاولة غلط.

شنو ينحفظ في جهازكم

الألعاب تحفظ في متصفحكم (localStorage) أشياء صغيرة عشان ترجعون لمكانكم:

• الاسم اللي كتبتوه، ورمز الغرفة ورمز مقعدكم فيها.
• الإعدادات، مثل الصوت و«وضع المحاضرة».
• الأسئلة اللي شفتوها، عشان ما تتكرر عليكم.
• «وضع الديوانية» في «جاوبها!» كامل: هذا يشتغل على الجهاز بس وما يوصلنا منه شي.
• لعبة الدامة ضد الكمبيوتر، وشنو تعلّم الكمبيوتر عن مستواكم.
• الإجابات اللي للحين ما انرسلت في «باص كومبليت».
• رمز «سجل المواجهات» والشلة اللي دخلتوها من هالجهاز.

هالأشياء تبقى في جهازكم، وما يوصلنا منها إلا اللي ترسله اللعبة للغرفة وقت اللعب. وتقدرون تمسحونها بأي وقت من إعدادات المتصفح (مسح بيانات الموقع). والجهاز يحفظ بعد نسخة من ملفات الألعاب نفسها، مو من بياناتكم، عشان تفتح أسرع.

الكوكيز: ما نستخدم كوكيز للإعلانات أو التتبع. الكوكي الوحيد يكون لصفحة محمية بكلمة سر، عشان ما تكتبون كلمة السر كل مرة، ويبقى ٣٠ يوم.

اللي ما نسويه

• لا إعلانات.
• لا Google Analytics ولا أدوات تتبع ولا بكسلات سوشال ميديا. الإحصائيات الوحيدة عدّاد زيارات من Cloudflare ما يعرف منو انتوا (تفاصيله تحت في «جهات ثانية»).
• كل ملفات الموقع، حتى الخطوط، من g3daa.com نفسه. الشي الوحيد اللي يجي من برا هو عدّاد الزيارات الصغير من Cloudflare.
• ما نطلب إيميل ولا رقم تلفون ولا موقعكم، والموقع ما يقدر يفتح الكاميرا أو المايك.
• ما نبيع ولا نشارك بياناتكم مع أحد.

جهات ثانية

Cloudflare

الموقع مستضاف عندهم. مثل أي استضافة، كل طلب يمر على خوادمهم وتوصلهم معلومات تقنية مثل عنوان الإنترنت، عشان يوصلون الصفحة ويحمون الموقع من الهجمات. هذا يخضع لسياسة الخصوصية مالتهم.

Cloudflare Web Analytics

عدّاد زيارات نستخدمه عشان نعرف كم زيارة تجينا، وأي صفحات وألعاب تنفتح أكثر، ومن أي دولة تقريباً، وأي نوع جهاز ومتصفح، والموقع جاكم منين، وشكثر تاخذ الصفحات لين تفتح. سكربت صغير ينزل من static.cloudflareinsights.com ويرسل العدّ لـ Cloudflare. ما يستخدم كوكيز ولا يحفظ شي في جهازكم، وما يتتبعكم من موقع لموقع، واللي نشوفه أرقام مجمّعة بس، ما نقدر نعرف منها منو انتوا. وإذا متصفحكم أو مانع الإعلانات منعه، الألعاب تشتغل عادي. يخضع هو بعد لسياسة الخصوصية مالتهم.

واتساب والمشاركة

زر «واتساب» أو «مشاركة» يفتح واتساب أو قائمة المشاركة في جهازكم ومعاه رمز الغرفة والرابط. ما يصير شي إلا إذا ضغطتوا، والرسالة تطلع منكم مو منا.

مصادر الصور

روابط «المصدر» في «حقوق الصور» توديكم ويكيميديا كومنز إذا ضغطتوها.

حقوقكم والمسح

• اللي في جهازكم: امسحوه بأي وقت من إعدادات المتصفح.
• الغرف: تنمسح بروحها بعد يوم.
• الشلة: أي عضو يقدر يطلع منها، وأقدم عضو يقدر يحذفها نهائياً من داخل اللعبة.
• «سجل المواجهات»: امسحوه نهائياً بزر «امسح السجل نهائياً» تحت السجل، من أي جهاز من الجهازين. ضاع الجهاز أو انمسح منه الرمز؟ راسلونا على hello@g3daa.com مع الرمز ونمسحه.
• أي شي ثاني: راسلونا على hello@g3daa.com ونمسحه. وإذا تبون تعرفون شنو محفوظ عن رمز معيّن، اسألونا.

الصغار

الألعاب للكل. إذا أعماركم أقل من ١٣ سنة، العبوا ويا أهلكم وخلّوهم يقرون هالصفحة. ما نسأل عن العمر وما نجمع شي عنه.

إذا تغيّر شي

إذا تغيّر اللي نحفظه بنحدّث هالصفحة وتاريخها فوق، وبنكتبه في «ملاحظات المطوّر».

شروط الاستخدام

لما تلعبون في «قعدة» يعني موافقين على هالشروط:

1. شنو «قعدة»: موقع ألعاب على المتصفح (g3daa.com) تلعبونها ويا الربع والأهل. اللعب الحين مجاني وبدون حساب. إذا صار فيه بيوم شي مدفوع، بنوضح سعره وشروطه قبل لا تدفعون أي شي.
2. العبوا بأخلاق: لا تكتبون أسماء أو رسائل أو أسئلة ولا ترسمون شي فيه سب أو تهديد أو تحرش أو عنصرية أو تنمّر، ولا تنشرون معلومات شخصية عن أحد (رقمه أو عنوانه أو صوره)، ولا تنتحلون شخصية أحد.
3. اللي تكتبونه مسؤوليتكم: الأسماء والدردشة وأسئلة «عن بعض» والرسمات منكم انتوا. ما نراقبها، لكن من حقنا نمسح أي غرفة أو شلة أو سجل فيه شي يخالف هالشروط أو القانون، ونوقف أي استخدام يضر الموقع أو اللاعبين.
4. لا تخرّبون: لا تحاولون تخترقون الموقع أو توقفونه أو تغرقونه بالطلبات، ولا تسوون برامج تلعب بدالكم أو تنسخ بنك الأسئلة.
5. الأسئلة: نتعب عشان تكون صحيحة، بس ممكن يطلع فيها غلط. لقيتوا غلط؟ بلّغوا عنه من زر «بلّغ». الأسئلة للتسلية مو مرجع، وأي معلومة دينية أو صحية ارجعوا فيها لأهل الاختصاص.
6. الحقوق: الألعاب وتصميمها ورسوماتها وأسئلتها وأسماؤها ملك «قعدة». الصور والخطوط والمكتبات المفتوحة ملك أصحابها، ونستخدمها حسب تراخيصها (تحت في «حقوق ومصادر»). العبوا وشاركوا الروابط براحتكم، بس لا تنسخون الألعاب أو الأسئلة وتنشرونها في مكان ثاني.
7. الأسماء التجارية: أسماء الشركات والبرامج والمسلسلات والأفلام اللي تجي في الأسئلة ملك أصحابها، ونذكرها بس عشان السؤال. «قعدة» ما لها أي علاقة فيهم، وهم ما يرعونها.
8. بدون ضمان: نقدّم الموقع مثل ما هو. ممكن يتعطل أو يتغير، أو توقف لعبة، أو تنمسح غرفة قبل وقتها. بالحد اللي يسمح فيه القانون، ما نتحمل أي خسارة بسبب استخدام الموقع أو توقفه.
9. تعديل الشروط: ممكن نعدّل هالصفحة. التاريخ فوق يقول آخر تعديل، وإذا كملتوا لعب بعده يعني موافقين على التعديل.
10. القانون: تنطبق على هالشروط قوانين دولة الكويت.

حقوق ومصادر

صور «جاوبها!»

من ويكيميديا كومنز بتراخيص حرة (CC0، CC BY، CC BY-SA، والملكية العامة). اسم كل صورة ومصوّرها ورخصتها ورابطها في زر «حقوق الصور» داخل اللعبة. صغّرناها وقصّيناها عشان تناسب اللعبة، والنسخ المعدّلة تبقى بنفس رخصة الأصل.

الخطوط

Aref Ruqaa، Amiri، Markazi Text، وNoto Kufi Arabic، كلها برخصة SIL Open Font License 1.1، ونستضيفها على موقعنا عن طريق Fontsource.

three.js

للوح الدامة ثلاثي الأبعاد، برخصة MIT.
Copyright © 2010–2023 three.js authors

الأصوات والرسومات

الأصوات تتولد بالكود وقت اللعب، والرسومات والأيقونات من شغلنا. والإيموجي يرسمها جهازكم.

تواصلوا ويانا

أي سؤال، أو طلب مسح، أو ملاحظة على هالصفحة: hello@g3daa.com